ერთად დახატული მშვიდობა

აგვისტოს ომი ერთადერთი ომია, რომელიც ისევ ჩვენშია, ისევ ნათლად გვახსოვს, ისევ განვიცდით და შედეგებიც ჯერჯერობით ისევ სახეზეა. არადა 2 წელი გავიდა. რა შეიცვალა ამ ორ წელში? მგონი არც არაფერი. უფრო სწორად შეიცვალა, წლევანდელ 8 აგვისტოს ომის წლისთავი ზარ-ზეიმით არ აღგვინიშნავს, არც ანრი ჯოხაძეს ან დედამისს დაუწერია საცეკვავო სიმღერა, არც მაშხალები გაგვიშვია ცაში და არც ახალი დაპირებები ყოფილა იმის თაობაზე, რომ იბერია გაბრწყინდება. სამაგიეროდ გორში რამდენიმე არაგრანდიოზული, მაგრამ საინტერესო აქცია ჩატარდა. მათ შორის ალბათ ყველაზე საინტერესო იყო კრეატიული სტუდია iGeo-ს (იხილეთ ვებ-გვერდი) და თავდაცვის სამინისტროს მიერ ორგანიზებული სამხატვრო მარათონი, სახელწოდებით “არა ტერიტორიულ კანიბალიზმს!”

სამხატვრო აკადემიის 8 სტუდენტი 8 აგვისტოს დილიდან გორში 8 ტილოს ხატავდა. თემა -თავისუფალი, ფორმა -პროტესტის, მგრამ მშვიდობიანი. ყვავილები, ყაყაჩოები, პეპლები.. “პატარა უფლისწული” გამახსენდა, თუმცა ბატკანი არავის დაუხატავს. სამაგიეროდ მხატვრებთან ერთად ბავშვები ხატავდნენ მზეს ქვაფენილზე.

ასეთი ფორმით გამოხატული მშვიდობიანი პროტესტი ძალიან მომეწონა. თბილისში დაბრუნებისთანავე iGeo სტუდიის ვებგვერდს ვეწვიე და კიდევ ბევრი რამ გავიგე ამ ორგანიზაციის შესახებ. მათი ერთ-ერთი ძალიან კარგი და საინტერესო პროექტია “ვმეგობრობთ უსინათლოებთან”, რომლის მიზანია უსინათლო პირთა სოციალურ-კულტურული დახმარება – ინტელექტუალურ-კულტურული და სოციალურ-ფსიქოლოგიური რეაბილიტაცია, რაც ხელს შეუწყობს მათ საზოგადოებაში ინტეგრაციას.